Posted on 2008-01-01 02:45
Cat Chen 阅读(1924)
评论(50) 编辑 收藏
（以下的是实验性文章，全文使用Cantonese书写而成，附带Mandarin翻译，请将鼠标移至带有下划线的短语上以查看翻译。）
點解成個博客園都喺度講“我嘅2007”，仲要大部分都差唔多……好，咁我就寫啲唔同啲嘅嘢，例如話……人脈啦。我要話，技術唔係最重要嘅，亦都唔係管理，而係人脈。
2007年，個人發展上嘅兩個重要事件，一係攞咗微軟嘅MVP，二係賣咗畀B家，兩樣都係要靠人脈嘅（要多謝嘅人自然非常多）。亦就係話，第一係你要認識人際網絡中充當關鍵節點嘅嗰個人，第二係嗰個人要睇得起你。簡單嚟講，如果你有能力，無論係技術定係管理，首先你要識得渠道（或者叫中間商），其次佢要覺得你超值，咁你先有機會賣得出去，而且賣個好價錢。喺冇渠道嘅前提下，大家都明白廠家直接向客戶銷售嘅成本有幾高，你一個人能夠聯係嘅買家數量就非常有限嘞。
如果一開始，我唔係喺Dflying同埋Jeffrey嘅blog上評論，佢哋亦唔會嚟睇我個blog，亦就唔會有佢哋鼓勵我將文章發到首頁，咁嘅話，可能dudu亦就唔會知道我嘅存在，咁dudu推薦我去攞MVP就唔知從何談起嘞。所以，攞MVP呢件事係一定要多謝Dflying、Jeffrey同埋dudu嘅。當然，仲要多謝所有嘅讀者，特別係有留言嘅嗰啲，因爲有留言自然激發思考。
然而，攞MVP並唔係終點，只係另一個起點嗟。之後，有中國嘅MVP峰會，Bean介紹我識咗唔少微軟嘅人同埋其他MVP，咁先有后嚟嘅一啲合作項目，例如話netcast啦。所以話，認人先有得做，因爲好多嘢係唔熟唔做嘅。係呢度，我要多謝Bean、Jeffrey、dudu，特別係dudu，完全唔講求回報咁支持我哋做netcast。
另外一件事，就係關於賣身㗎嘞，我嘅意思係搵工。寫“我嘅2007”嘅人入邊，咁多人寫自己今年畢業搵工如何如何，我又點可以唔寫啊。搵實習嘅事就唔講嘞，全職申咗好幾間有噃咁上吓大嘅IT公司，包括BGM，其中B家同G家都搵過人做推薦（多謝布丁同埋Junyu）。B家係最早畀offer嘅，所以就賣咗畀B家算嘞，G家同M家嘅申請算係“無疾而終”（冇拒信，hold咗喺唔知邊個環節度）。但係，我想講嘅唔係點樣賣畀大公司囉，而係推薦有幾重要囉。
如果冇人推薦，你份簡歷好可能石沉大海都冇人話畀你知，而且石沉大海嘅概率仲唔細添。但係，有人推薦嘅話，你就好清楚個流程嘞，其中每個環節對你評價如何亦都透明一啲，咁你就可以不斷調整自己嘞。推薦人熟悉公司内各個職位嘅差別嘅話，對你選擇職位亦有幫助，好似高考選專業咁蠱蠱吓就唔好啦。（如果你高考嗰時已經識得搵師兄問清楚個專業係讀咩嘅，咁你可以跳過呢段嘞。）
當然，最重要嘅係推薦你嘅嗰個人真係認爲你值得擁有呢個職位，而唔係應付你。佢有幾積極幫你，就反映咗呢一點，亦影響住佢份推薦嘅效力。唔好以爲佢幫你喺ERP或者HR之類嘅系統填吓就掂，佢越落力幫你跟呢件事，幫你同你嘅面試官溝通你嘅情況，你嘅成數就越大。如果你搵到個人，只係礙于人情而推薦你，根本唔覺得你將來成爲佢同事嘅話對佢對同公司都有好處，咁你得到嘅好處無非就係免筆試，對促進你同公司之間嘅互相了解一啲作用都冇。
免筆試……免筆試又有咩用呢？其實筆試過後離offer仲有十萬八千里咁遠。聼講G家喺美國本來就冇筆試，只係中國應屆畢業生實在太多嘞，咁就筆一筆，篩一篩。有時甚至亦就唔筆嘞，咁樣推薦唔推薦都係一面起步，你希望你嘅優勢更好咁傳達畀面試官知嘅話，除咗面試嘅時候表現要好啲，就靠推薦人嘅溝通嘞。
最後，通過一個故事結束本文。曾經，Mary總係好有激情咁同人講佢個仔同埋佢個仔間新公司，其中一個聽衆就係Unity Way嘅董事會成員：John Opel。五年之後，John Opel，亦就係IBM嘅董事長，要為IBM嘅機器搵一個操作系統。佢去咗邊度搵？去咗Washington嘅Redmond會見Mary個仔，即係Bill Gates。多謝同埋IBM嗰單生意，Bill Gates做咗首富。如果John Opel從嚟未聽講過佢個名嘅話，IBM絕對唔會派人去Redmond睇一間當時幾乎同Microsoft一樣默默無聞嘅公司。